ټاکنيزې مبارزې

کابل(پژواک، ٢٥  تله ۹۷): د ټاکنو خپلواک کمېسیون وايي چې د ټاکنیزو سیالیو موده نن شپه پای ته رسېږي او له دې وروسته د ولسي جرګې هېڅ نوماند د کمپاین حق نه لري، له سرغړونکو سره به قانوني چلند وشي.

 

لومړى تعقيب-لښکرګاه(پژواک،٢٥تله٩٧): د ولسي جرګې غړى او نوماند عبدالجبار قهرمان په يوه چاودنه کې و وژل شو او اووه تنه نور ټپيان شول.
د هلمند د والي وياند عمرځواک د تلې په ٢٥مه پژواک خبري اژانس ته وويل چې نن له غرمې مخکې د ولسي جرګې د غړي او نوماند عبدالجبار قهرمان د ټاکنيز کمپاين په دفتر کې چاودنه وشوه.
ځواک وايي چې په دې پېښه کې خپله قهرمان وژل شوى او اووه تنه نور ټپيان شوي دي.
هغه وايي:((چاودېدونکي توکي د قهرمان د ناستې په کوچ کې ځاى پرځاى شوي وو چې چاودنه يې پرې وکړه.))

هرات ښار (پژواک، ۲۳ تله ۹۷): په هېواد کې د ټاکنيزو  کمپاينونو له پيل راهيسې تر اوسه، ۲۰۰ شکايتونه د ټاکنيزو شکايتونو کمېسيون کې ثبت شوي دي.
د ټاکنيزو شکايتونو کمېسيون وياند علي رضا روحاني چې هرات ولايت ته يې سفر کړی و، نن يې د خبري غونډې پرمهال وويل چې دا کمېسيون د خپلو دندو تر سره کولو لپاره چې ټاکنو کې د عدالت خونديتوب او ټاکنيزو شکايتونو ته رسېدنه ده، بشپړ چمتووالی لري.
هغه زياته کړه چې ۱۰۲ حقوقپوهان د ازادې سيالۍ له لارې، ټاکنيزو شکايتونو ته د لاسرسي لپاره  د ټاکنيزو شکايتونو په کمېسيون کې د کمېشنرانو په توګه د افغانستان ۳۴ ولايتونو لپاره ګومارل شوي دي.

جلال اباد (پژواک، ۲۳ تله ۹۷): د ننګرهار ولايت سوداګر وايي چې د ولسي جرګې نوماندان دې د کاميابۍ په صورت کې د دوی ستونزو ته ځانګړې پاملرنه وکړي.
سوداګرو له نوماندانو دا غوښتنې د تلې په ۲۳مه جلال اباد ښار کې د خصوصي متشبثينو د ملاتړ نړيوالې ادارې له لوري د خصوصي سکتور او نوماندانو ترمنځ د تفاهم او اقتصادي اصلاحاتو په هکله د ګردي مېز پرمهال وکړې.
په ننګرهار کې د دغې ټولنې استازي ډاکټر شېر علي مومند وويل چې له دغه ګردي مېز څخه موخه د اقتصاد په اړه د نوماندانو د برنامو اورېدل او له سوداګرو يې په اړه د نظرياتو راټولول دي.

کابل (پژواک،٢٣ تله ۹۷): ولسي جرګې د ټاکنیزو مبارزو تر پیل وروسته د اوونۍ په جریان کې یوازې دوشنبې ناسته ترسره کوله، خو نن «دوشنبې» د اکثریت وکیلانو د غیرحاضرۍ له امله دغه ناسته هم ترسره نه شوه.
د ولسي جرګې د نوماندانو ټاکنیزې سیالۍ د تلې په ۶ مه پيل او د همدې میاشتې تر ۲۵ مې دوام لري. د ولسي جرګې ټاکنې د روانې میاشتې په ۲۸ مه ترسره کېږي.
د ولسي جرګې رییس د تلې په څلورمه ویلي و چې دغه جرګه د ټاکنیزو مبارزو په جریان کې په یوه اوونۍ کې یوه ورځ کار کوي، خو کارپوهانو له مصوبې پرته د جرګې دا تصمیم ناقانونه بللى و.

پل علم (پژواک،٢٣تله ٩٧): لوګر کې ناپېژانده کسانو د ولسي جرګې د يوه نوماند خطاب دراني د کمپاين دفتر ته اور اچولى دى.
د لوګر د محمد اغې ولسوال نورمحمد عبيدي د تلې په ٢٣مه پژواک خبري اژانس ته وويل چې تېره شپه نامعلومو کسانو د پل کندهاريو په سيمه کې د ولسي جرګې د نوماند خطاب دراني د کمپاين دفتر ته اور اچولى دى.
هغه وايي چې د دې پېښې په تور تر اوسه څوک نه دي نيول شوي، خو په اړه يې پلټنې روانې دي.
د پل کندهاريو د بازار يو تن هټيوال سميع الله پژواک ته وويل: ((سهار چې موږ راغلو ګورو  چې د دراني صاحب د کمپاين دفتر ته اور اچول شوى دى.))

ګردېز (پژواک، ٢٢ تله ٩٧): په پکتيا کې د ولسي جرګې نوماندان د ټاکنيزو کمپاينونو له نا انډولۍ شکايت کوي او وايي چې د ولسي جرګې برحال غړي له دولتي امکاناتو او واکونو ګټه اخلي.

 

دويم تعقيب- کندوز ښار (پژواک، ٢٢ تله ٩٧): په تخار ولايت کې د ولسي جرګې د يوې نوماندې نظيفه بېګ پر کمپاين چاودنه کې لږ تر لږه ٢٢ کسان وژل شوي او ٣٦ نور ټپيان دي.
دغه چاودنه پرون له غرمې وروسته د تخار ولايت په رستاق ولسوالۍ کې د ولسي جرګې د نوماندې نظيفې بېک د کمپاين پر غونډې شوې وه.
د تخار د والي وياند سنت الله تيمور د تلې په ٢٢مه پژواک خبري اژانس ته وويل چې په دې پېښه کې ٢٢ کسان وژل شوي او ٣٦ نور ټپيان دي.
تيمور زياتوي چې په وژل شوو کې يو امنيتي سرتېرى او په ټپيانو کې څلور پوليس او پاتې نور ټول ملکي وګړي دي.

هرات (پژواک،۲۱ تله ۹۷): په هرات کې د ولسي جرګې د یوه نوماند د ټاکنیز کمپاین پر دفتر د ناپېژاندو وسله والو په برید کې دوه کسان وژل شوي او دوه نور ټپیان دي.
د هرات د والي ویاند جیلاني فرهاد پژواک خبري اژانس ته وویل: ((دغه برید نن ماسپښین د هرات ولایت د انجیل ولسوالۍ په جغرتان دوه لاري کې د ولسي جرګې د نوماند سید عظیم کبرزایي د ټاکنیز کمپاین پر دفتر شوی دی.))
هغه زیاته کړه چې په دې پېښه کې د یاد نوماند یو ساتونکی او یو ماشوم وژل شوي او یو کس ټپي دی.
نوموړی وايي چې د دې پښې د عاملینو د نیولو لپاره څېړنې روانې دي.

ګردېز (پژواک، ٢٠ تله ٩٧): په ګردېز کې د ولسي جرګې د کانديد ډاکتر يار باز حميدي پر دفتر وسله وال بريد شوى دى.
يار باز حميدي پژواک خبري اژانس ته وويل چې بريد شاوخوا يوه بجه په بلندمنزلو ښارګوټي کې د ده پر دفتر شوى دى.
ده زياته کړه، په دې پېښه کې د دفتر دوه ساتونکى ټپيان شوي چې د يوه ټپونه ډېر دي.
د پکتيا امنيه قوماندان مل پاسوال رازمحمد مندوزى وايي، د بريد په تړاو يې څېړنې پيل کړې او له بشپړېدو وروسته به يې له رسنيو سره شريکې کړې.
د دغه بريد مسووليت چا پر غاړه نه دى اخيستى.

Pages

Subscribe to ټاکنيزې مبارزې