Kandahar All Elections News

کندهار ښار (پژواک ٢٤ غبرګولى ٩٣): د کندهار ښار د رايو په يوه مرکز کې د رايو پاڼې خلاصې شوې دي.
په ټول هېواد کې د غبرګولي په ٢٤مه سهار اوه بجې د ولسمشرۍ د دويم پړاو ټاکنې پيل شوې چې د مازديګر تر څلورو بجو پورې به دوام ولري.
په ټول کندهار کې دغه پروسه پيل شوې او د ځايي چارواکو په وينا، تر اوسه کومه امنيتي ستونزه نه ده رامنځته شوې.
د کندهار د ټاکنو د خپلواک کمېسيون مشر عبدالهادي داوري وايي چې په دغه ولايت کې ټول مرکزونه فعال دي او خلک په ډاډه زړه خپلې رايې کاروي.

کندهار ښار ( پژواک، ١٦ ورى ٩٣ ) : د کندهار چارواکي وايي، چې د ټاکنو د ګډوډلو په موخه د پاکستانيو ځواکونو له خوا پر درېيو سرحدي ولسواليو بريدونه شوي دي.
دغه څرګندونې د کندهار والي توريالي ويسا او امنيه قوماندان جنرال عبدالرازق د وري په ١٦مه، د ټاکنو په اړه ديوې ګډې خبري غونډې پر مهال وکړې.
والي توريالي ويسا وويل، چې پاکستانيو ځواکونو له نن سهار راهيسې د ټاکنو د ګډوډولو او په خلکو کې د وېرې خپرولو په موخه پر معروف ، ارغستان او شوراوک ولسواليو توغندويي بريدونه کړي دي.
خو هغه زياته کړه، چې په دې بريدونو کې چاته مرګ ژوبله نه ده اوښتې.

کندهار ښار (پژواک ٨ لړم ٩٢): په کندهار ولايت کې د ټاکنو د خپلواک کمېسيون د ځايي دفتر مرستيال د خپلو مامورينو له خوا وهل شوى او ټپي کړى يې دى.
په دغه ولايت کې د ټاکنو د کمېسيون د دفتر مشر انجنير عبدالهادي د لړم په ٨مه پژواک خبري اژانس ته وويل، چې دا پېښه پرون رامنځته شوې ده.
هغه زياته کړه، چې د ځايي دفتر د مرستيال محمدرحيم احمدي او يو شمېر مامورينو تر منځ تر لفظي شخړې وروسته لاس اچول شوى او له امله يې احمدي ټپي شوى دى.
دى وايي، چې پوليسو ياد مامورين نيولي او اوس تر پوښتنو لاندې دي.

کندهار ( پژواک ٣٠ زمرى ٩٢ ) : په کندهار کې د کرکټ د نړيوال لوبغالي اړوند تاسيسات د افغانستان د کرکټ بورډ په مالي مرسته جوړ او ګټې اخيستنې ته وړاندې شول.
د کرکټ نړيوال لوبغالى د کندهار ښار په عينو مېنه کې د هندوستان هېواد په مرسته جوړېږي، چې د مسوولينو په وينا، د جوړولو کار به يې تر راتلونکو څو مياشتو پيل شي.

کندهارښار(پژواک،٢٣زمرى٩٢): د کندهار امنيتي چارواکي وايي، چې د دغه ولايت پر عمومي زندان يې د بريد پلان شنډ کړى او په دې تړاو يې لس کسيزه وسله واله ډله نيولې ده.
دغه څرګندونې د کندهار د ملي امنيت رييس ډګروال عيسى محمد نن د زمري په ٢٣مه، اوونيزې امنيتي غونډې ته وکړې، چې پکې د کندهار والي، امنيه قومندان، د ملي اردو د ٢٠٥ اتل قول اردو درستيزوال، په سوېل کې د ايساف قوماندان او يو شمېر نورو نظامي مسوولينو برخه لرله.
د کندهار د ملي امنيت رييس ډګروال عيسى محمد وويل، چې وسله والو مخالفينو د کندهار پر عمومي زندان د بريد پلان درلود، چې د هغوى له لوري شنډ شوى دى.

کندهار ( پژواک ٢٠ زمرى ٩٢ ) : په کندهار ولايت کې د روغتيايي زده کړو په يوه دولتي او دوو خصوصي مرکزونو کې ٥٠٠ نارينه او ښځينه زده کوونکي د نرسنګ، قابله توب، فارميسي او لابراتوار په څانګو کې په زده کړو بوخت دي.
دغه ښځينه او نارينه زده کوونکي په داسې حال کې روغتيايي زده کړې تر لاسه کوي، چې دا مهال د کندهار ولايت په روغتيايي مرکزونو کې د مسلکي ډاکټرانو تر څنګ نرسانو او قابلو ته سخته اړتيا ليدل کېږي.

کندهار ( پژواک ۱۲ زمری ۹۲ ) په کندهار کې د مسعوديه په نوم له يوې ديني مدرسې څخه ٧٧٠ تنه نارينه او ښځينه زده کوونکې فارغ او برليکونه ورکړل شول.
د فراغت په دغو مراسمو کې د کندهار ولايت مرسيتال عبدالقديم پتيال، د ولايتي شورا رئيس حاجي سيد جان خاکرېزوال، ديني عالمانو او نورو ګډون کړى و.
د مسعوديه مدرسې مشر مسعود اخندزاده پژواک خبري اژانس ته وويل، فارغو شويو هلکانو او نجونو د نهو مياشتو په موده کې ديني او عصري زده کړې کړې، چې پکې تجويد، د قران کريم زده کړه، فقه، عقايد او نور شامل دي.

کندهار ( پژواک ۱۲ زمری ۹۲ ) د کندهار ولايت چارواکي وايي، چې د نوم ليکنې هغه کارټونه، کتابونه او يو شمېر وسايل يې بيرته موندلي، چې درې ورځې مخکې په ارغنداب ولسوالۍ کې غلا شوي وو.
دغه مرکز د ارغنداب ولسوالۍ په دوراهي سيمه کې و، چې څو ورځې وړاندې پکې د ټاکنو لپاره د نوم ليکنې لړۍ پيل شوې وه، خو د شپې له پلوه يې ځينې وسايل غلا شول.
د کندهار ولايت مقام مرستيال عبدالقديم پتيال د زمري په ۱۲مه، په يوه خبري غونډه کې وويل، چې دغه توکي د ناوړه موخو لپاره غلا شوي او بيا تر ځمکۍ لاندې ځاى پر ځاى شوي وو.

کندهار ( پژواک ٩ زمرى ٩٢ ): د کندهار ولايت په ارغنداب ولسوالۍ کې د ټاکنو لپاره د نوم ليکنې يو مرکز لوټ شوى دى.
دغه مرکز د ارغنداب ولسوالۍ په دوراهي سيمه کې ده، چې څو ورځې وړاندې پکې د ټاکنو لپاره د نوم ليکنې لړۍ پيل شوې وه.
د ارغنداب ولسوال حاجي شاه محمد احمدي د زمري په ٩مه، پژواک خبري اژانس ته د دغه مرکز د لوټ کېدو پېښه ومنله، خو ويې ويل، کېداى شي، چا غلا کړې وي، خو مخالفين دا کار نه شي کولاى، ځکه په دغه سيمه کې بشپړ امنيت دى.