Kandahar ټاکنیز خبرونه

کندهار (پژواک ٢٥ غبرګولى ٩٣): خلک او چارواکي وايي، چې په کندهار ولايت کې د تېر په پرتله په دويم پړاو ټاکنو کې ستونزې کمې وې او دغه پروسه په ښه توګه ترسره شوه.
که څه هم پرون د ټاکنو په ورځ شاوخوا ١١ بجې اوه ځانمرګي بريد کوونکي د کندهار ښار د درېيمې ناحيې اړوند د پاچا خان جادې په سيمه کې د استوګنې يوه بلاک ته ختلي وو، خو د امنيتي ځواکونو له خوا په کلابندۍ کې وساتل شول او کله چې ټاکنې پاى ته ورسېدې، عمليات ورباندې پيل شول، چې اوس هم دوام لري.

کندهار: ( پژواک ٢٠ غبرګولى ٩٣):د کندهار ولايت د ټاکنو خپلواک کمېسيون وايي چې د ټاکنو په ورځ به په دغه ولايت کې له ٢٤٠ ټاکنيزو مرکزونو څخه ١٣٤ د خلکو پر مخ پرانيستي وي او پاتې ١٠ به د ځينو ستونزو له امله تړلي وي.
په دې اړه په کندهار پريس کلب کې خبري غونډه جوړه شوې وه چې د کندهار د ټاکنو د خپلواک کمېسيون مشر انجنير عبدالهادي داوري او له کابل څخه راغلې د ټاکنو د کمېسيون کمېشنرې ګلالۍ اڅګزۍ په کې ګډون کړى و.

کندهار ( پژواک، ١٩ غبرګولى ٩٣ ) : په کندهار کې د ټاکنو د خپلواک کمېسيون د رسنيو کمېشنر له خبريالانو وغوښتل، چې د خپلو رسنيو له لارې دې د دويم پړاو ټاکنو په اړه د خلکو د عامه پوهاوي لپاره پراخ کار وکړي.
د ټاکنو کمېسيون د رسنيو کمېشنر نجيب اڅګزي دغه څرګندونې د کندهار ولايت له خبريالانو سره په يوه ګډه غونډه کې وکړې ، چې د اطلاعاتو او کلتور رياست د غونډو په تالار کې جوړه شوې وه.
نجيب اڅګزي وويل، دا چې د دويم پړاو ټاکنو ته د ګوتو په شمېر ورځې پاتې دي، د رسنيو استازي دې د خلکو د عامه پوهاوي لپاره خپلې هلې ځلې چټکې کړي.

کندهار (پژواک ٢٩ غويى ٩٣): د کندهار ولايت د ټاکنو خپلواک کمېسيون وايي، په دويم پړاو ټاکنو کې يې د ټاکنيزو محلونو شمېر زيات کړى او په دغه ولايت کې به د غبرګولي په ٢٤مه د رايې ورکولو يوولس سوه محلونه د خلکو پر مخ پرانيستي وي.
دغه څرګندونې د ولايت مقام په هغې غونډه کې وشوې، چې د تېرو ټاکنو د ستونزو او نيمګړتياوو د ارزونې په موخه جوړه شوې وه.

کندهار (پژواک ١١ غويى ٩٣): د کندهار ولايت د ټاکنيزو شکايتونو کمېسيون وايي، چې د ولايتي شورا اړوند ٧٤ ټاکنيز شکايتونه ورسره ثبت شوي، چې د څېړنې کار يې راتلونکې اونۍ پيلېږي.
په کندهار کې د ټاکنيزو شکايتونو د کمېسيون مشر مړوند وزيري پژواک خبري اژانس ته وويل، د ولايتي شورا اړوند په ثبت شوو ټاکنيزو شکايتونو کې ١٦ يې د پوليسو او پاتې نور د ټاکنو د کمېسيون په اړه دي.

کندهارښار(پژواک١٠غويى٩٣): د کندهار ولايت امنيتي مسوولين وايي، که ټاکنې دويم پړاو ته لاړې شي، نو هغوى د امنيت د خوندي کولو لپاره بشپړ چمتووالى لري.
دغه څرګندونې په اوونيزه امنيتي غونډه کې وشوې، چې د کندهار والي ډاکټر توريالي ويسا، د ولايت مرستيال عبدالقديم پتيال، د سولې د ولايتي شورا رييس حاجي عطا محمد احمدي د افغان او ايساف ځواکونو قومندانانو پکې ګډون کړى و.
په دغه غونډه کې د امنيتي ځواکونو مسوولينو وويل که ټاکنې دويم پړاو ته لاړې شي، نو د تېر په څېر د امنيت خوندي کولو ته بشپړ چمتووالى لري.

کابل ( پژواک، ٧ غويى ٩٣ ) : يو شمېر هېوادوال په دې اند دي، چې که ټاکنې دويم پړاو ته ولاړې شي،نو دوى به يو ځل بيا پکې په پراخه کې کچه ګډون وکړي.
د ولسمشرۍ او ولايتي شوراګانو ټاکنې، چې د ١٣٩٣ لمريز کال د وري په ١٦مه،ترسره شوې، لومړۍ پايلې يې تېره ورځ اعلان شوې، چې له مخې يې يو کانديد هم پنځوس جمع يو سلنه رايې ترلاسه نه کړې او ښايي ټاکنې دويم پړاو ته ولاړې شي.
د ټاکنو د کمېسيون د معلوماتو له مخې، ډاکټر عبدالله ٤٤،٩ او ډاکټر اشرف غني احمدزى ٣١،٥ سلنه رايې اخيستې دي او اټکل کېږي، چې دواړه به دويم پړاو کې سره مقابله کوي.

کندهار ښار (پژواک ٣١ ورى ٩٣): د کندهار ولايت د ولايتي شورا يوه کانديد په پاکستان کې د نامعلومو وسله والو له خوا وژل شوى دى.
د کندهار د اطلاعاتو او کلتور رييس او د ولايت سرپرست وياند دواخان مينه پال د وري په ٣١مه پژواک خبري اژانس ته وويل چې دغه کانديد شاه محمود جلال نومېده.
هغه زياته کړه، چې نوموړى د درملنې په موخه د ډيورنډ پولې پورې غاړه د پاکستان کوېټې ښار ته تللى و، چې تېره ورځ د ناپېژانده وسله والو له خوا وژل شوى دى.
د مينه پال په وينا، د نوموړي مړى تېره ورځ ناوخته کندهار ښار ته لېږدول شوى او اوس په ميرويس روغتون کې دى.

کندهار (پژواک ٢٧ ورى ٩٣): د کندهار ولايت د ټاکنو خپلواک کمېسيون د يو شمېر ټاکنيزو مرکزونو او محلونو د هغو صندوقونو د رايو بيا شمېرنه پيل کړې، چې د درغليو شک ورباندې کېږي.
د رايو د بيا شمېرلو چاره د نوماندانو د استازو، خبريالانو، د افغانستان د ازادو او عادلانه ټاکنو د بنسټ د غړو او د ټاکنيزو کمېسيونونو د نماينده ګانو پر وړاندې ترسره کېږي چې د چارواکو په وينا دغه لړۍ به تر نږدې يوې مياشتې دوام وکړي.
د کندهار د ټاکنو د خپلواک کمېسيون رييس انجنير عبدالهادي داوري د وري په ٢٧مه پژواک خبري اژانس ته وويل، چې د رايو د بيا شمېرلو چاره يې د مرکزي دفتر په غوښتنه پيل کړې ده.