Paktika ټاکنیز خبرونه

ښرنه (پژواک٢٦غبرګولى٩٣):دپکتیکادټاکنوکمېسیون چارواکي وایي، چې په دویم پړاو ټاکنوکې دپکتیکاخلکو له لومړي پړاو څخه ډېره ونډه اخيستې وه.
ددې ولایت دټاکنو کمېسیون رييس ذبیح الله وګړي پژواک خبري اژانس ته وویل، ټولو محلونوته يې نږدې څلوره سوه اوپنځه ویشت زره رایې پاڼې لېږلې وې، چې نږدې څلور سوه زره یې کارول شوې دي.
دټاکنو کمېسیون رييس وویل:(( که څه هم په یوشمېر سیموکې دمخالفینوګواښونه وو؛ خوبیا هم زموږ خلکو په مېړانې سره خپل ملي مسوولیت ترسره کړ او د رایې ورکولو مرکزونو ته لاړل.))

ښرنه (پژواک ٢٤ غبرګولى ٩٣): د پکتيکا چارواکي وايي، چې په دغه ولايت کې ټاکنې د امن په فضا ترسره شوې.
د ياد ولايت د ټاکنوکمېسيون رييس ذبيح الله وګړي د غبرګولي په ٢٤مه پژواک خبري اژانس ته وويل، چې په پکتيکا کې د رايو ورکولو ټول مرکزونه پرانيستي وو.
نوموړي زياته کړه، چې د ټاکنو پر مهال يې هيڅ يوه کارکوونکي ته مرګ ژوبله نه ده اوښتې او نه يې کوم مرکز تړلى و.
په دغه ولايت کې د رايې ورکولو ٢٦٦ مرکزونه وو، چې د ټاکنو پر مهال ټول پرانيستي وو او هيڅ ډول ستونزه په کې رامنځته نه شوه.

ښرنه ( پژواک، ٢٣ غبرګولى ٩٣ ) : د پکتيکا ولايت چارواکي وايي چې د ملي اردو سرتېرو او د ولسمشرۍ د کانديد ډاکټر عبدالله لسګونو پر يوې مدرسې او مېلمه راډيو بريد کړى دى.
دا پېښه د غبرګولي په ٢٣مه، ددغه ولايت په ارګون ولسوالۍ کې رامنځته شوې ده.
د مېلمه راډيو مسوول محمدالله همت يار پژواک خبري اژانس ته وويل چې نن د ولسمشرۍ د کانديد عبدالله شاوخوا ٥٠ تنه پلويان چې د ملي اردو سرتېري هم ورسره وو، ددوى پر راډيو بريد وکړ.
هغه زياته کړه، چې دغو کسانو ددوى دوه خبريالان وهلي او د راډيو ښېښې او نور وسايل يې هم مات کړي دي.

ښرنه-غزني،کلات(پژواک،١١غبرګولى٩٣):د پکتيکا او غزني ديني علماوو د ټاکنو لپاره د عامه پوهاوي د ترسره کولو او د زابل يو شمېر ښځينه وو؛ د ټاکنو د امنيت غوښتنه وکړه.
د پکتيکا ديني علماوو په ټاکنو کې د ونډې لپاره د عامه پوهاوي د ترسره کولو دا ژمنه په هغه غونډه کې وکړه، چې همدا نن د دغه ولايت د ټاکنو کمېسيون له لوري رابلل شوې وه.
د غونډې يو تن برخه وال او قومي مشر ملامعصوم وويل، چې په لومړي پړاو ټاکنو کې د ياد ولايت ډېرو اوسېدونکو برخه اخيستې وه او په دويم پړاو کې به يې هم ګډون ښه وي.

ښرنه- کابل(پژواک،٧ورى٩٣):دپکتيکا او ميدان وردګو ولايتونو ديني عالمانو او قومي مشرانو د ټاکنو په بهير کې د همکارۍ او د ښځو پر ونډې ټينګار وکړ.
دوى دا ژمنې د کتيکا د ټاکنو خپلواک کمېسيون په هغې غونډه کې وکړې، چې د سلګونه ديني علماوو، قومي مشرانو او د مدني ټولنو استازو په کې برخه اخيستې وه.
د پکتيکا د ټاکنو خپلواک کمېسيون رييس ذبيح الله په ټاکنو کې د ديني عالمانو او قومي مشرانو رول اغېزمن وباله.

ښرنه (پژواک،٢١ کب٩٢): دپکتيکاامنيه قوماندان وايي،چې په دغه ولايت کې ٧٩ ټاکنېز مرکزونه ترلوړ امنيتي ګواښ لاندې دي.د دې ولايت امنيه قوماندان پاسوال نبي جان ملاخېل دکب په ۲۱مه، له پژواک خبري اژانس سره په ځانګړې مرکه کې وويل، اوس مهال ددې ولايت د رايې ورکولو له ټولو ۲۶۶ مرکزونو څخه ۷۹ يې تر لوړ امنيتي او۱۰۱ مرکزونه يې ترټيټ امنيتي ګواښ لاندي دي ، خو په نږدې راتلوونکي کې به ددغو مرکزونو ګواښ ټيټې کچې ته راشي.

ښرنه (پژواک٢٢ليندۍ٩٢): د پکتیکا امنیتي چارواکي په دې ولايت کې د امنيت ډاډ ورکوي او وايي چې چمتو دي د راتلونکو ټاکنو لپاره ډاډمن امنيت تامين کړي، ترڅو خلک له هر ډول وېرې پرته په ټاکنو کې برخه واخلي.
د پکتيکا امنیه قوماندان مل پاسوال دولت خان ځدراڼ وايي د تېر په پرتله به په دې ولایت کې ټاکنې په پوره امنیتي فضاکې ترسره شي.

ښرنه (پژواک ٤ ليندۍ ٩٢): په پکتيکا کې د ټاکنو د خپلواک کمېسيون سيمه ييز چارواکي وايي، چې په دغه ولايت کې تر اوسه ۵۲۵۲۲ کسانو نوم ليکنه کړې او د ولايت په مرکز کې اوس هم د نوم ليکنې لړۍ دوام لري.
د دغه ولايت د ټاکنو د ځايي دفتر مشر زراب شاه د ليندۍ په ۳مه پژواک خبري اژانس ته وويل، د يادو کسانو له ډلې يوازې ۲۴۵۹۴ مېرمنې دي چې د پکتيکا په مرکز او ولسواليو کې يې د رايې ورکولو کارتونه ترلاسه کړي دي.
نوموړی وايي، د لړم په ۲۰مه په ولسواليو کې د نوم ليکنې بهير پای ته ورسېد، خو په مرکز کې لا هم د نوم ليکنې لړۍ دوام لري.