Baghlan ټاکنیز خبرونه

پلخمري (پژواک،۱۱غويى ۹۸): د بغلان په مرکز پلخمري کې د ولسي جرګې د يوه نوماند د پلويانو له خوا د لويې لارې بندولو، عام خلک او په ځانګړي ډول ناروغان له ګڼو ستونزو سره مخامخ کړي دي.
د ټاکنو خپلواک کمېسيون د تېرې پنجشنبې په ورځ د بغلان د ولسي جرګې ټاکنو وروستۍ پايلې اعلان کړې چې د دغه ولايت ځينو نوماندانو يې مخالفت وکړ.
د دغو نوماندانو له ډلې څخه د محبوب الله غفاري پلويانو له تېرې جمعې ورځې راهيسې په مرکز پلخمري کې د کابل-شمال لويه لار د ترافيکو پرمخ تړلې ده. هغوى وايي چې غفاري دې له بنده ازاد او د بغلان د ولسي جرګې د ټاکنو په وروستۍ پايله کې شامل شي.

پلخمری (پژواک، ١٦ مرغومى ٩٧): د بغلان چارواکي وايي چې وسله والو طالبانو د ولسي جرګې يو نوماند تښتولى دى.
د بغلان والي عبدالحي نعمتي د مرغومي په ١٦مه پژواک خبري اژانس ته وويل چې وسله والو طالبانو د ولسي جرګې نوماند زلمى زهير تښتولى دى.
هغه وايي چې زهير په مرکزي بغلان ولسوالۍ په خپل کلي خواجه خان کې د ځمکو پر ليدو بوخت و چې طالبانو له ځان سره بيولى دى.
والي وویل: ((ما ته د رسېدلو معلوماتو له مخې، انجنیر زهیر له خپلو ورېرونو سره د ځمکې پر سر حقوقي دعوه لري او ورېرونه یې د وسله والو طالبانو په لیکو کې دي،  دغه کار هغوی کړى دى.))

پلخمري (پژواک، ٢٨ تله ٩٧): د بغلان په ځینو سیمو کې د ټاکنو له امله رامنځته شوو پېښو کې اته کسان وژل شوي او ۵۴ نور ټپيان دي.
د بغلان د عامې روغتیا ریاست مرستیال ډاکتر عبدالعلیم غفاري د تلې په ۲۸مه پژواک ته وویل چې نن په دغه ولايت کې د ټاکنو له امله رامنځته شوو امنیتي پېښو له امله اته  مړي او ۵۴ ټپيان روغتون ته انتقال شوي دي.
ډاکټر غفاري زیاتوي چې یواځې پلخمري ښار دننه دوه پرله پسې چاودنو کې يو کس وژل شوى او اووه نور ټپيان شوي دي.

پلخمري (پژواک، ١٩ وږى ٩٧): په بغلان کې د ټاکنو کمېسيون چارواکي وايي چې د دغه ولايت د ټاکنيزو مرکزونو د ښځينه محلونو لپاره تر اوسه ښځينه کارکوونکې نه دې ګومارل شوې.