Helmand ټاکنیز خبرونه

لښکرګاه-ترينکوټ (پژواک ٢٩ غبرګولى ٩٣): د هلمند او اروزګان اوسېدونکي وايي چې  بايد رايو ته يې درناوى وشي.
هغوى د ولسمشرۍ د کانديد ډاکټر عبدالله وروستۍ څرګندونې هم وغندلې.
په دغه ولايتونو کې په همدې غبرګون بېلابېلې غونډې جوړې شوې چې قومي مشرانو، ديني علماوو او د مدني ټولنو استازو په کې برخه لرله.
د اروزګان د مرکز ترينکوټ يوه قومي مشر معلم رحمت الله  په دې غونډه کې وويل، دواړه نوماندان بايد پر ټاکنيزو کمېسيونونو باور ولري، څو جوته کړي چې په کومو سيمو کې درغلي شوې ده.
ده وويل، چې د اروزګانيانو پاکو رايه ته دې په سپکه سترګه نه کتل کېږي.

لښکرګاه (پژواک، ۲۶ غبرګولى ۹۳): په هلمند ولايت کې د ټاکنيزو موادو  پر کاروان بريد کې يو پوليس او دوه د ټاکنو د دفتر کارکوونکي وژل شوي دي.
د هلمند امنيه قوماندان پاسوال عبدالقيوم باقي زوى وايي، نن له غرمې وروسته په شاوخوا يوه بجه د نوزاد ولسوالۍ د ټاکنو د خپلواک کمېسيون د ټاکنيزو موادو پر کاروان بريد وشو.
ده پژواک خبري اژانس ته وويل، په دې پېښه کې د ټاکنو کمېسيون يو کارکوونکى وژل شوى، يو پوليس او يو موټرچلوونکى ټپيان دي.

لښکرګاه (پژواک ٢٤ غبرګولى ٩٣): د هلمند چارواکي وايي چې د تېرو ټاکنو په پرتله په دويم پړاو ټاکنو کې د هلمنديانو ونډه ډېره ده.
په دغه ولايت کې د رايې ورکولو ټول مرکزونه پرانيستې دي.
د هلمند والي جنرال محمدنعيم د غبرګولي په ٢٤مه پژواک خبري اژانس ته وويل، چې په دغه ولايت کې نن سهار اوه بجې د رايې ورکولو لړۍ پيل شوې ده.
والي وويل، چې د رايې ورکولو د ټولو مرکزونو امنيت خوندي دى او په ټاکنو کې د خلکو ونډه بې سارې ده.
په تېرو ټاکنو کې د هلمند يو سل او لس زره اوسېدونکو ګډون کړى وو.

 
لښکرګاه (پژواک۳۰ غويى ۹۳): د هلمند چارواکي وايي، د وسله والو هغه پلانونه يې شند کړي، چې غوښتل يې په دغه ولايت کې دويم پړاو ټاکنې ناامنې کړي.
د هلمند امنيتي چارواکو دغه څرګندونې د غويي په٣٠مه په هغې امنيتي غونډه کې وکړې، چې د دغه ولايت والي او امنيتي چارواکو په کې ګډون درلود.
دغه چارواکو وايي، وسله والو د ولسمشرۍ د دويم پړاو ټاکنو د مخنيوي لپاره بېلابېل پلانونه درلودل، چې مخنيوى يې شوى دى.
د هلمند والي تورن جنرال محمدنعيم په دې غونډه کې وويل، په همدې موخه په بېلابېلو سيمو کې عمليات شوي، چې ګڼو وسله والو ته په کې مرګ ژوبله اوښتې ده.