Helmand ټاکنیز خبرونه

 
لښکرګاه (پژواک ۱۸ ورى ۹۳): د هلمند د ټاکنو کمېسيون مسوولين وايي، له موسى کلا او نوزاد ولسواليو پرته د ټولو سيمو د رايو صندوقونه لښکرګاه ته رسېدلي دي.
د ياد کمېسيون رييس قدرت الله نقشبندي د وري په ١٨مه پژواک خبري اژانس ته وويل، چې د لېږد دغه بهير له امنيتي ستونزو پرته ترسره شوى دى.
د ده په وينا، يواځې د نوزاد او موسى کلا ولسواليو د رايو صندقونه او نور مواد د ورښتونو له امله پاتې دي او سېلابونو يې د را لېږد مخه نيولې ده.
نقشبندي وايي، چې په دغه ولايت کې د تمې خلاف په پراخه توګه خلکو په ټاکنو کې برخه واخيسته او د ټاکنو بهير په امن فضا کې ترسره شو.

 
پل علم-لښکرګاه (پژواک ١٢ ورى ٩٣): چارواکي وايي، چې په لوګر او هلمند ولايتونو کې د بېلابېلو پېښو له امله ٩ وسله وال وژل شوي او ٥ نور ټپيان دي.
د ملي امنيت عمومي رياست وايي، چې نن شاوخوا يوه بجه د لوګر په ولايت کې د يوه قوماندان په ګډون هغه ٦ وسله وال په چاودنه کې ووژل شول، چې يوه ځانمرګي بريدګر ته يې د چاوېدونکو توکو ډک واسکټ ور تاړه.
د دغه رياست له لوري د وري په ١٢مه پژواک ته په رالېږل شوې خبرپاڼه کې ويل شوي، چې پېښه د ياد ولايت د څرخ ولسوالۍ د شش کلا په سيمه کې رامنځته شوې ده.
په خبرپاڼه کې د وژل شوي طالب قوماندان د هويت په اړه څه نه دي ويل شوي.

 
لښکرګاه (پژواک ۱۰ ورى ۹۳): د هلمند د ګرشک اوسېدونکي وايي، چې په دې ولسوالۍ کې ډېرى خلکو د رايو کارتونه نه دي اخيستي او د ټاکنو په اړه عامه پوهاوى پروسه هم کمرنګه ده.
د ګرشک يوه اوسېدونکي احمدجان پژواک خبر اژانس ته وويل، اوسمهال په دې ولسوالۍ کې امنيت ښه دى، خو د رايې اچونې لپاره يې کارت نه دى ترلاسه کړى.
د ده په خبره، چې څو مياشتې وړاندې په دې ولسوالۍ کې د نوم ليکنې دفتر پرانيستل شوى و، خو د ګڼې ګوڼې له امله تر وروستيو ونه توانېد، چې کارت ترلاسه کړي.
بلخوا د دې ولسوالۍ کې يو شمېر اوسېدونکي امنيت ډاډمن بولي، خو د ټاکنو په برخه کې عامه پوهاوى کمرنګه ګڼي.

 
لښكرګاه (پژواک ٦ ورى ۹۳): د هلمند چارواکي وايي، چې د راتلونکو ټاکنو لپاره کلکو امنيتي تدابيرو په دغه ولايت کې د کوکنارو ضد کمپاينونه ټکني کړي دي.
چارواکي وايي، د تېرې يوې مياشتې په موده کې ، چې يې په دغه ولايت کې د كوكنارو د له منځه وړو كمپاين پيل کړى، تر اوسه يې ۱۸زره جريبه ځمكه له كوكنارو پاکه کړې ده.
د دغه ولايت د والي مرستيال احمد مسعود بختور پژواک ته وويل، چې د كوكنارو د له منځه وړو پر مهال له كومې ستونزې سره نه دي مخ شوي، خو وروستيو اورښتونو او د ټاكنو پروسې لپاره تياريو يې کارونه ځنډني کړي دي.