Helmand ټاکنیز خبرونه

لښکرګاه (پژواک ١٦ چنګاښ ٩٢): د هلمند په کجکي ولسوالۍ کې يو قومي مشر د پوليسو له بند څخه د تښتېدو پر مهال وژل شوى دى.
د کجکي اوسېدونکي مدير معصوم د چنګاښ په ١٦مه پژواک اژانس ته وويل، چې د حاجي عبدالقادر په نوم يو قومي مشر دوه ورځې مخکې د پوليسو له خوا له وسله والو طالبانو سره په تړاو نيول شوى و، خو تېره شپه وژل شوى دى.
نوموړى وايي، عبدالقادر د کجکي د سفلا سيمې د ميان رودي کلي اوسېدونکى و او پنځه مياشتې مخکې يې د ولسوالۍ د شورا غړيتوب هم ترلاسه کړى و.

لښكرګاه-جلال اباد (پژواك ۱۳ چنګاښ ۹۲): د هلمند په مرکز لښکرګاه کې د وسله والو په يوه بريد کې يوه ښځينه پوليسه او په يوه چاودنه کې څلور نجونې وژل شوې دي.
د هلمند د والي وياند عمر ځواك د چنګاښ په ۱۳مه پژواک اژانس ته وويل، نن سهار اوه بجې د بست تصدۍ په سيمه كې د اسلام بي بي په نوم پر يوې پوليسې او د هغې پر زوم د دوو موټرسايكل سپرو له خوا بريد وشو.
د ده په خبره، په پېښه كې پوليسه او زوم يې ټپيان شول، خو روغتون ته تر رسېدو وروسته پوليسې د ټپونو له امله ساه وركړه او زوم يې تر درملنې لاندې دى.

لښکرګاه (پژواک ۲۷ غبرګولی ۹۲): د هلمند پر امنيه قوماندان نن سهار په شوي ځانمرګي بريد کې درې تنه ټپيان شوي او دى خپله ترې روغ وتلى دى.
دغه بريد نن (د غبرګولي ۲۷مه) سهار شاوخوا شپږ نيمې بجې د لښکرګاه ښار په لطيف څلورلارې کې شوی دی.
د هلمند د والي مرستيال احمد مسعود بختور تر پېښې څو شېبې وروسته پژواک خبري اژانس ته وويل، چې دغه ځانمرګی بريد د يوه کرولا موټر په وسيله شوی دی.
هغه زياته کړه، چې ځانمرګي خپل موټربم د امنيه قوماندان نبي الهام له موټر سره جنګولی او چاودنه يې ورکړې ده.

کابل ( پژواک ٢٥ غبرګولى ٩٢ ) : بريتانوي ځواکونه خپل پوځي مرکز د هلمند له لښکرګاه څخه د ګرشک ولسوالۍ باسټيان ته ليږدوي.
له ٢٠٠٦ زېږديز کال راهيسې ،چې بريتانوي ځواکونه په هلمند کې ځاى پر ځاى شوي وو د خپلو نهو زرو سرتېرو قومانده يې له لښکرګاه څخه پرمخ وړه.
بريتانوي رسنيو د پوځي چارواکو په حواله د غبرګولي په ٢٥مه، خبر ورکړى، چې دوى خپل پوځي مرکز ددې لپاره په لښکرګاه کې جوړ کړى و، څو له افغان ځايي چارواکو سره له نږدې وګوري او مشورې ورکړي.

لښكرګاه (پژواك ۱۸ غبرګولى ۹۲): د هلمندپه ګرشك ولسوالۍ كې شپږ سيمه ييز پوليس په مرموز ډول وژل شوي دي.
يوه سيمه ييز چارواکي ، چې د نوم له اخيستو يې ډډه کوله د غبرګولي په ١٨مه پژواک خبري اژانس ته وويل، چې دا پېښه تېره شپه د ګرشك ولسوالۍ په زمنبلي سيمه كې رامنځته شوې ده.
د سرچينې د معلوماتو له مخې، چې په پوسته كې ټول شپږ پوليس وو او ښايي په پوسته کې دننه د هغوى د مېلمنو له خوا وژل شوي وي.
طالب وياند قاري يوسف احمدي وايي، چې ياد سيمه ييز پوليس تېر ماښام د دوى ارتباطي کسانو وژلي او د پوليسو يو کرولا موټر او وسلې يې هم ترې وړې دي.

لښکرګاه (پژواک،١٧غبرګولى٩٢): په هلمند کې لسګونو سيمه ييزو پوليسو ته د يوې مياشتې په موده کې، د جنګي تاکتيکونو ترڅنګ د قانون د پلي کولو او له خلکو سره د ښه چلند په برخه کې په لومړي ځل روزنه ورکړل شوه.
دهلمند امنيه قوماندان سمونوال عبدالنبي الهام وايي، چې تر دې وړاندې يواځې ملي او د عامه نظم پوليسو ته روزنه ورکول کېده،خو دا لومړى ځل دى، چې سيمه ييزو پوليسو ته په دې ولايت کې روزنه ورکول کېږي.
الهام وايي، چې ٧٩ پوليسو ته د يوې مياشتې په موده کې د مسلکي ښوونکو له خوا روزنه ورکړل شوه.

لښكرګاه (پژواك ۱۵ غبرګولى ۹۲): چارواکي وايي،چې د هلمندپه سنګين ولسوالۍ كې د ماين چاودنو شپږ ملكي وګړي وژلي.
د هلمند د والي وياند عمر ځواك د غبرګولي په ۱۵مه پژواك اژانس ته وويل، چې تېره ورځ په دوو جلا چاودنو كې شپږ عام وګړي ووژل شول.
هغه زياته کړه، چې په وژل شوو کې درې سړي او درې ښځې شاملې دي.
د ځواک په وينا، د ساروان كلا سيمې د ملازو كلي اوسېدونكو د وسله والو طالبانو د ډېر ورتګ له مله خپل کورونه پرېيښي وو.
د ده په خبره، چې تېره ورځ بېرته افغان ځواكونو سيمه تر خپل واك لاندې راوسته او وتلي خلک بېرته خپلو کورونو ته ستانه شول.

لښكرګاه (پژواك ۱۴ غبرګولى ۹۲): د كورنيو چارو وزير وايي، د هلمند د سنګين ولسوالۍ د جګړې پلان په پاكستان كې جوړ شوى دى.
د کورنيو چارو وزير مجتبى پتنګ دغه څرګندونې تېره ورځ هلمند ته د خپل سفر پر مهال په يوه خبري ناسته کې وکړې.
نوموړي وويل، سنګين ته يې د سفر موخه دا وه، چې د امنيت ارزونه وكړي او تر څنګ يې د افغان امنيتي ځواكونو اړتياوې او مورال له نږدي وګوري.
د ده په خبره، كه څه هم د دولت وسله والومخالفينو په سنګين كې په لويه کچه بريدونه پيل كړې، خو افغان ځواكونو په ځانګړې توګه سيمه ييزو پوليسو يې په ډېرې چټكۍ سره مخه ونيوه.

لښكرګاه (پژواك ۱۳ غبرګولى ۹٢): چارواکي وايي،چې د هلمند په سنګين ولسوالۍ کې د افغان ځواکونو او وسله والو تر منځ جګړه کې ٢٤ وسله وال طالبان وژل شوي دي.
د هلمند د والي وياند عمر ځواك د غبرګولي په ۱۳مه پژواك خبري اژانس ته وويل، چې تېره ورځ يو ځل بيا د ساروان كلا د هراتيانو په سيمه كې جګړه شوې ده.
د ده په خبره، ياده سيمه دوه ورځې مخکې د يو لړ عملياتو په ترڅ كې له وسله والو مخالفينو پاكه شوې وه، خو تېره ورځ بيا د وسله والو طالبانو خوځښتونه په کې ليدل شوي دي.

لښكرګاه (پژواك ١٢ غبرګولى ۹٢): د هلمند امنيه قوماندانۍ مسوولين وايي، د جرمونو د مخنيوي په موخه يې د پوليسو ۱۱۹ ځانګړې ټيلېفوني شمېره نن په دغه ولايت کې فعاله كړه.
د هلمند د امنيه قوماندانۍ د امنيت امر سمونوال غلام رباني بهاوي د غبرګولي په ١٢مه پژواک اژانس ته وويل، د ١٩٩ شمېرې له فعالېدو سره به د ډېرو ناوړو پېښو مخه ونيول شي.
د كورنيو چارو وزارت د ۱۱۹ شمېرې عمومي رييس همايون عيني، چې په همدې موخه هلمند ته تللى و وايي، د يادې شمېرې پر مټ توانېدلي، چې د زرګونو پېښو مخه ونيسي.