Helmand

 
لښكرګاه (پژواك ٤ چنګاښ ۹۲): د هلمند پوليسو د يوه كمين په ترڅ كې سلګونه كيلوګرامه وچ ترياك نيولي دي.
د واشير ولسوالۍ امنيه قوماندانۍ مرستيال لومړى څارن نثاراحمد د چنګاښ په ٤ مه پژواك اژانس ته وويل، د يو کشفي راپور پر اساس يې نن سهار ۳۶۰ كيلوګرامه وچ ترياك نيولي دي.
نوموړى زياتوي، چې د نشه يي توكو لېږدوونكو غوښتل،دغه توکي د واشير د تيلغلا له سيمې په يوه موټر كې وليږدوي، چې پوليسو يې پر وړاندې عمليات ترسره كړل.
د امنيه قوماندان په خبره، په همدي مهال جګړه هم رامنځته شوه، چې په ترڅ كې يې يو قاچاق وړونکى ووژل شو او دوه ميله وسله هم ورڅخه ترلاسه شوې ده.

 
لښکرګاه (پژواک، د چنګاښ لومړۍ نېټه ٩٢): د هلمند د مجاهدينو شورا وايي، چې په دغه ولايت کې د فساد او د ځمکو غصب اوج ته رسېدلي دي.
دغه څرګندونې د هلمند د جهادي شورا غړو په هغې غونډه کې وکړې، چې د چنګاښ په لومړۍ نېټه په لښکرګاه کې جوړه شوې وه.
دوى ويل، چې پر دولتي څوکيو د نا اهلو کسانو ګومارنې فساد ته لاره هواره کړې چې له امله يې حالات د بحران پر لور روان دي.
د حاجي حقبين په نوم يوه پخواني جهادي قوماندان وويل، چې په تېرو يوولسو کلونو کې دولت او نړيواله ټولنه په دې ونه توانېدل چې په متوازنه توګه ولس ته خدمات وړاندې کړي، خو برعکس يې ناخوالو ته لاره هواره کړه.

 
لښکرګاه (پژواک ۲۷ غبرګولی ۹۲): د هلمند پر امنيه قوماندان نن سهار په شوي ځانمرګي بريد کې درې تنه ټپيان شوي او دى خپله ترې روغ وتلى دى.
دغه بريد نن (د غبرګولي ۲۷مه) سهار شاوخوا شپږ نيمې بجې د لښکرګاه ښار په لطيف څلورلارې کې شوی دی.
د هلمند د والي مرستيال احمد مسعود بختور تر پېښې څو شېبې وروسته پژواک خبري اژانس ته وويل، چې دغه ځانمرګی بريد د يوه کرولا موټر په وسيله شوی دی.
هغه زياته کړه، چې ځانمرګي خپل موټربم د امنيه قوماندان نبي الهام له موټر سره جنګولی او چاودنه يې ورکړې ده.